Nachdem mir d Ämtli fertig gmacht hend, het d Firma Dreifel mal wieder i Schwirigkeite gsteckt. D Popcorn Maschine het nüm so ta wie si sött und das het zu grosser Ufregig gfüert. Zum s Problem behebe, hemmer alli e Fabrik nacheme Modell müesse ufbaue, jedoch isch die Ufgab erschwert worde durch verschidensti Beiträchtigunge, die eusi Teamarbeit umso wichtiger gmacht hend. Nachere meh oder weniger erholsame Nacht hemmer bi eusere Lieblingsaktivität, em Gritibänze, über d Bedürfnis vo eusne TNs gredet, wie mir die erfülle chönd und sie uf ihrem persönliche Entwickligsweg begleited. Drufabe sind mir zum Schuelhuus und hend zwei TNBs gha wo Teilnehmendi bewiese hend, dass sie en LS-Block (falls ihr nöd ufpasst hend: LS staht für Lagersport) leite chönd. Zum Abschluss vom Morge hemmer en DINKL (Diversität & INKLusion) Block gha i dem mir in Gruppe über d Theme Diskriminierig, Stereotype und Vorurteil diskutiert und später no Plakat bastlet über Gender/Sex und Gender identitäte. Zum Zmittag hemmer d Möglichkeit gha zum wiiter das Thema bespreche. So hetts en schöne Abschluss geh und mir sind hoffentlich jetzt e chli sensibler gegenüber andere Mensche und ihrne Lebenssituatione.